Quatro Ciàcole (5 maggio 2003)

In quel contenidor de fèrtie produssion artìstica e cultural che pròspera nela citadina de San Donà, se distingue l'atività de ART STUDIO (fondada el Giugno del '94 e operativa dal '92) secondo el criterio istitussional de promossion de le arti del palcossènico, e in special modo de la Danza Classica e la Danza Contemporanea. Nicoletta Vaccher, mestrina, siora de bravura, professionaità e esperienza, rapresenta el centro motor de ART STUDIO, data la avolgente sensibiità che ne l'insegnamento sa trasmétar a le alieve in misura superior al doveroso inpegno scolàstico, in un clima de armonìa che se ritrova in particolar modo in campo artìstico. Infati: a védarla diriger la so coorte de alieve, da le bambine ai corsi più avanzai, el polso vellutato se associa amabilmente co l'ordine e la diligenza. Nicoletta (la grazia del nome ben se coniuga co la vocassion artìstica) scomincia da l'età de oto ani a studiar danza clàssica, perfezionando l'atività professionìstica soto la guida de maestri de ciara fama internassional, traverso "stages" par diverse articolassion stiìstiche ne l'arte de Tersicore. L'Artista se presenta co credensiài de riguardo, praticando atività professionìstica in diversi teatri e produssion lìriche in Italia e a l'èstero, anca come baerina soista a fianco de i più grandi nomi del balletto. E ancora, intèrprete de trasmission su i grandi canài televisivi. Ne l'82, otien el diploma de teorìa e solfegio presso el conservatorio musical "Benedetto Marcello" de Venezia: finessa de contorno che ghe dona lustro a la figura de danzatrice. Lassà le esibission in palcossènico, Nicoletta se inpegna ne la creassion de coreografìe e a l'insegnamento, a Venezia e Pordenone, par aprodar, nel '91, a la diression de la Scuola di Danza a San Donà, producendo un inpulso quaitativo e de adesion che procura inviti al so balletto par spetàcoi e rassegne-concorso nel Veneto e, fora confin, co la Danza jazz gemeada co Villeneuve sur Lot. Ma l'atension de N.V. se rivolge anca a la promossion de "stages" co maestri de grido, par le alieve de ART STUDIO. Giulia Tubia Tanta costansa e dedission professionai da parte de N.V. matura meritatamente i fruti. Eco, da la so covada, spuntar a l'orizonte, come ciliegina sula torta, na stèa de nome Giulia Tubia sandonatese, 18 ani, studentessa modèo del Licèo "Galilei" de San Dona, che riesse a rivar al prestigioso obietivo de frequentar la scuola de danza in quel santuario rapresentà da la La Scala de Milano. Vien amessa al sètimo ano del corso in virtù de 'e capacità dimostràe superando briantemente 'a severa selession da parte de 'a comission esaminatrice del teatro meneghino; conclude a Giungo col'8° ano de corso. Ma anca in altri inpegni Giulia a savù distìnguarse. Da "promettente" alleva de la Scuola Musical Monteverdi de Musile (ambiente fèrtie che sforna zóvani talenti artistici) a entusiasmà tante platèe in giro par l'Italia, meritàndose premi e riconossimenti, primegiando in concorsi e "saggi" musicai da virtuosa del pianoforte. Un profìo artìstico ecessional, el suo, dove la bravura se coniuga armoniosamente co gran volontà e forsa de caràtere a sostegno de tanta atività par mantegner contemporaneamente, e a alti livèi, i studi liceài (co maturità pròssima, a Giugno, a Milano), quei al conservatorio (dove l'aprendimento de la mùsica ben se adata al senso del ritmo ne la danza) e del studio prìncipe, a "La Scala", che rapresentà el sogno primario de G.T., consapévoe dei duri inpegni e dificoltà da afrontar. Come se no bastasse sto "tour de force", Giulia no finisse de maravejar. Eco l' ùltimo salto de quaità. Propio in marzo Giulia a partecipa al concorso promosso dal "Rudra Béjart Lausanne", entrando fra le prime 21 su 150 candidate. El che significa dover frequentar par 2 ani el corso de perfezionamento al "Rudra" soto la pressiosa diression del grande Maurice Béjart. Come a dir: el percorso più giusto e direto verso na briante carierà. Ma come sostien Giulia, co amàbie soriso e disarmante sicuressa: "Se diventassi una ballerina potrei davvero realizzare il mio sogno". Semo tuti d'acordo, e voiosi de amirar la libellula de San Dona esibirse sul palcossènico. Guido de Nobili